Open site navigation

Kvennastyrkur

Hver erum við?

Viðar Bjarnason

Yfirþjálfari og eigandi

Viðar er reynslubolti á sviði þjálfunar og hefur yfirumsjón með tímum Kvennastyrks ásamt því að kenna þá ansi marga. Hann er einkaþjálfari frá Intensive PT í Svíþjóð og er þrautreyndur á sínu sviði. „Ég var yfirþjálfari þreks hjá RVK MMA og sá um styrktarþjálfun yngri flokka hjá Val síðustu misseri. Í dag hef ég fært mig alveg yfir í Kvennastyrk ásamt því að vera þrekþjálfari meistaraflokks kvenna í handbolta hjá Val. Í öllum okkar tímum er hægt að aðlaga æfingar að þörfum hverrar og einnar sem gerir konum kleift að prófa það sem þeim langar til, burt séð frá fyrri reynslu. Við bjóðum fjölbreytta tíma fyrir fjölbreyttar konur og hlökkum mikið til haustsins í hjarta Hafnarfjarðar.“

Halldóra Anna Hagalín

Framkvæmdarstjóri og eigandi

Halldóra er með MBA gráðu frá Háskóla Íslands og hefur áratugareynslu í markaðs- og stjórnunarstörfum. „Þjálfun er nokkuð ný fyrir mér en ég hef góðan grunn og vinn undir styrkri handleiðslu Viðars. Ég sé þó aðallega um rekstrarhluta Kvennastyrks en ég hef undanfarin átta ár verið hjá Heklu, nýverið sem þróunarstjóri  eftir að hafa verið markaðsstjóri í nokkur ár. Þá tek ég að mér ráðgjafastörf fyrir smærri aðila í markaðsmálum sem og heimasíðugerð.“ Halldóra er með MömmuStyrk tvisvar í viku ásamt því að stökkva inn í aðra tíma í afleysingar.

Alda Ólafsdóttir

Þjálfari

Alda verður með 55+ tímana í vetur ásamt Styrk nokkrum sinnum í viku. Alda er menntaður Íþróttafræðingur frá Háskóla Íslands og er að hefja mastersnám á því sviði. Alda hefur stundað fótbolta frá unga aldri og hefur lagt stund á Crossfit. Hún er einnig með Crossfit-Level 1 þjálfararéttindi. ,,Íþróttir, líkamsrækt og heilsa er það sem ég brenn mest fyrir. Ég hef þjálfað ýmis fótboltanámskeið og svo sá ég nýlega um stólaleikfimi og einstaklingsþjálfun á hjúkrunarheimili. Ég hef lært margt af reynslu minni og menntun og legg mikla áherslu að fólk hreyfi sig rétt og vel.“

Árný Ingveldur Brynjarsdóttir

Yoga kennari

Árný leiðir Yoga hjá Kvennastyrk í vetur. Árny lngveldur Brynjarsdóttir hefur kennt yoga síðan 2014. Hún er menntaður Hatha/lyengar yoga kennari frá Open Sky Yoga frá New York og Restorative yoga lærði hún 2018 undir handleiðslu Judith Lasater frá Bandaríkjunum. „Ég hef mikinn áhuga á líkamlegri og andlegri vellíðan kvenna og legg mig fram við að leiðbeina og þjóna þeim sem til mín koma í tíma.“ Yoga er eins og kennarinn, mjúkt, einstaklingsmiðað, róandi og hentar öllum sem vilja byrja að stunda yoga.

Jóna Dóra

Þjálfari

Jóna Dóra mun kenna MömmuStyrk þrisvar í viku í vetur. Jóna Dóra er styrktarþjálfari frá ÍAK og fimm barna móðir. Áhugasvið hennar liggur í styrktarþjálfun og næringu en hún er hlaupari að að upplagi og hefur nýtt sér styrktarþjálfun fyrir sig sjálfa. „Ég er einnig snyrtifræðimeistari með áratuga starfsreynslu, ég hef Cidesco réttindi frá Kaupmannahöfn, kennsluréttindi frá HÍ auk þess að vera Markþjálfi frá Evolvia. Sem styrktarþjálfari legg ég áherslu á mikilvægi þess að hlusta á líkamann, búa sér til góðar venjur og sterkan grunn til að vinna út frá."

Um okkur

Kvennastyrkur er líkamsræktarstöð fyrir konur á Strandgötu 33 í Hafnarfirði þar sem boðið er upp á hvetjandi, faglega og vandaða þjálfun. 

 

Markmið Kvennastyrks er að ýta undir ákefðina og hvatann sem býr innra með okkur. Í Kvennastyrk stuðlum við að heilbrigðu sambandi við hreyfingu, vinnum að því að auka trú á eigin getu og njótum á æfingu.

Gildi Kvennastyrks eru:

  • Samheldni 

  • Virðing

  • Metnaður

Samheldni: Í grunninn erum við ein heild í Kvennastyrk. Það er engin fremri en önnur og allir að vinna á sínum hraða. Við leggjum mikið upp úr því að vera ekki að bera okkur saman við hvor aðra eða hvernig við einu sinni vorum heldur að vera stoltar af okkur eins og við erum í dag. Við erum alltaf að gera okkar besta miðað við aðstæður og dagsform og er það hluti af samheldninni að við getum öll staðið saman í því að skapa ómetanlega orku hér í Kvennastyrk.

 

Virðing: Í Kvennastyrk berum við virðingu fyrir hvor annarri. Allar eigum við okkar eigin sögu og okkar ástæður fyrir því að við erum eins og við erum í dag. Við leggjum upp með að bera virðingu fyrir öllum. Það er engin ein rétt leið að okkur sjálfum og tökum við okkur eins og við erum. 

Metnaður: Rauði þráðurinn í öllu sem við gerum í Kvennastyrk er metnaður. Með miklum metnaði fylgir framúrskarandi þjónusta og fagmennska. Við leggjum mikið upp með að upplifun af vörum og þjónustu hjá Kvennastyrk sé góð og gerum allt í okkar valdi til þess að það verði af því.